გარეჯა

გუშინ მთელი სამსახური საგარეჯოში ექსკურსიაზე ვიყავით. როგორც ასეთი, არ მიყვარს, როცა ბევრი ხალხი მივდივართ სადმე, მაგრამ ამჯერად კმაყოფილი დავრჩი. მოკლედ ასე, გავედით სამსახურიდან ორი ავტობუსით. ქართულ პუნქტუალობას აღარ ჩავუღმავდები, დაგვიანების გარეშე რომ არ იქნებოდა, თვითონაც ხომ იცით. გზაში ძალიან ბევრი ვიცინეთ, თუმცა კი გვეძინებოდა ყველას. მგზავრობა იმაზე კარგად ავიტანე, ვიდრე მეგონა.

როგორც მოგეხსენებათ გარეჯის მამათა მონასტერი მდებარეობს გარე კახეთში, აზერბაიჯანის საზღვართან, გარეჯის უდაბნოში, რომელიც ისეთი უდაბნო სულაც არაა, როგორიც მე წარმომედგინა. მონასტერი დაარსებულია მე-6 საუკუნეში ამბა დავითის მიერ, რომელიც ერთ-ერთი იყო ცამეტ ასურელ მამათაგან. დარწმუნებული ვარ, ისტორია ჩემზე კარგად იცით, ამიტომ მე მხოლოდ შთაბეჭდილებებს გადმოგცემთ.

ვისაც ჯერ კიდევ გეპარებათ ეჭვი, რომ საქართველო ულამაზესი ქვეყანაა, ეს ადგილები უნდა ნახოთ! მე თვითონ ფოტოაპარატი არ მქონდა, ახლო წარსულში ვიმსხვერპლე, ამიტომ ჩემი ძვირფასი კოლეგების გადაღებულ ფოტოებს დავდებ აქ. კარგი ფოტოებია, თუმცა, რაღაცეები, რისი გადაღებაც მე მინდოდა, არავის შეუმჩნევია.  ენივეი, გავაგრძელოთ!

საგარეჯო. მონასტერში მისვლამდე სულ ასეთი სიმწვანეა:

ავტობუსის ფანჯრიდანაა გადაღებული. რეალურად, ბალახი უფრო მოლურჯო იყო და ქარის მობერვაზე ზღვასავით ღელავდა.

ესეც ტბა, უფრო სწორად მისი ნაწილი:

თავად მონასტერი ძალიან შთამბეჭდავია, როგორც უკვე აღვნიშნე, არქიტექტურული ძეგლები განსაკუთრებულ ემოციებს არ აღმიძრავს, თუმცა გარეჯს არქიტექტურა ნაკლებად შეიძლება ეწოდოს, ის ხომ კლდეში ნაკვეთია. ქვემოთ იხილეთ ფოტოები, მონასტერი სხვადასხვა რაკურსიდან:

ბერების კელიები:

 

სამლოცველო:

დავით გარეჯელის საფლავი. როგორც ხედავთ, ხალხი ძვირფასეულობას სწირავს  და სურვილის ასრულებას შესთხოვს. გულზე რომ ქვა ადევს, მას რომ შევეხე, საოცარი სიმშვიდე ვიგრძენი და ძალა (დამცინეთ რამდენიც გინდათ, ათეისტებო)!

 

 

ზედხედი:

ზევით ძველი კელიებია შემორჩენილი, თავად დავით გარეჯელის დროინდელი. ამათ რომ ვუყურებდი, ძრწოლა მიტანდა! აქ ხალხი ცხოვრობდა, ფხლით იკვებებოდა და უფალს ემსახურებოდა! რამხელა რწმენაა! ვიცი, რომ ვისაც ღმერთის არ გწამთ, ამ ბერების მოღვაწეობა სიზიფეს შრომად მიგაჩნიათ, მაგრამ გაითვალისწინეთ, ადამიანები, რომლებიც ყველაფერს სწირავენ საკუთარი რწმენისათვის, პატივისცემას იმსახურებენ!

 

ძველი მოხატულობა:

სულ ზემოთ 6 000 მოწამის სახელობის ეკლესიაა. მე იქამდე ვერ ავედი, სამწუხაროდ 😦

ამ ბერმა ძალიან საინტერესოდ გვიამბო დავით გარეჯელისა და თავად მონასტრის შესახებ, თუმცა სხვა რელიგიების კრიტიკისაგან თავი ვერ შეიკავა:

ბოლოს, კიდევ რამდენიმე ფოტო, უბრალოდ დააკვირდით რა საოცარი ფერებია! მე მგონი, ისევ ხატვა მომინდა!

ექსკურსია რესტორანში დავასრულეთ. ქართული ღრეობები გულზე არ მეხატება, მაგრამ ამჯერად ყველაფერმა კარგად ჩაიარა. არ ყოფილა ყანწების ფრიალი, არავინ დამთვრალა ისე, რომ სახლში წასაღები გამხდარიყო ან საცივში თავი ჩაეყო. სამაგიეროდ, ვიცეკვეთ ძალიან ბევრი! პრაქტიკულად, არ დავმჯდარვარ! ბოლოს კი შთაბეჭდილებებით აღვსილი დავბრუნდით თბილისში. ჰეჰ, იცით რა მიკვირს? სულ ერთი დღე გავატარე კომპიუტერის და ცივილიზაციის გარეშე და ასე მგონია, საშინლად მოვწყდი აქაურობას და საერთოდ, საუკუნეა ინტერნეტში არ მიძრომიალია. ედიქშენ, იზ ნოთ ით?!

მოკლედ, ვისაც ჯერ არ გინახავთ და ვინც ფოტოებმა ვერ დაგარწმუნათ, კიდევ ერთხელ დაჟინებით გირჩევთ მოინახულოთ დავითგარეჯი! მიზეზები საკმარისზე მეტია:

მათთვის, ვისაც გწამთ:

ალბათ, კარგად მოგეხსენებათ, დავით გარეჯელის მოღვაწეობის მნიშვნელობა ქრისტიანობის შენარჩუნებისათვის. დარწმუნებული ვარ, იერუსალიმიდან წამოღებული ქვის ისტორიაც იცით, ჰოდა, თავადაც მიხვდებით, რამხელა მადლია ამ მონასტრის მოლოცვა!

ვისაც არ გწამთ:

• ყველაფერი ახლის ნახვა საინტერესოა;
• მონასტერ მნიშვნელოვანი ისტორიული ძეგლიცაა, შეგიძლიათ ამ კუთხით შეხედოთ;
• ნახავთ ულამაზეს ადგილებს;
• ფეხით ბევრი სიარული ჯანმრთელობისათვის სასარგებლოა

ვისაც დავით გარეჯელზე მეტის შეტყობა გსურთ, იხილეთ აქ.

 

 

---