მწარეს ბლოგი

chez moi

plans, plans, plans

დაბრუნების მიუხედავად დიდად აქტიური არ ვარ, არა? რას ვიზამთ, დაძაბული რიტმის შედეგია! გადავწვიტე ჩემს ბლოგს ახალი დანიშნულება მოვუძებნო, თვითდისციპლინის გამყარებისა და დღის ბოლოს “დაცლისათვის” გამოვიყენო! „ბრიჯიტ ჯონსის დღიური“ თუ გაქვთ წაკითხული (დიდი არაფერი საკითხავია, ერთადერთი გამონაკლისია, როცა ფილმი უფრო მომეწონა, ვიდრე წიგნი) იქ აკეთებს ყველა ჩანაწერის წინ რეზუმეს იმ დღის განმავლობაში რამდენი კალორია და ჭიქა ალკოჰოლი მიიღო, რამდენი ღერი სიგარეტი მოწია და რამდენი იდიოტური აზრი მოუვიდა თავში. ჰოდა, მეც დაახლოებით იგივეს გავაკეთებ! სიგარეტი და ალკოჰოლი არ იქნება ჩემს სიაში, მაგრამ კალორიები და იდიოტური აზრები, რამდენიც გინდათ! ასევე დავამატებ ვარჯიშის შესახებ ინფორმაციას და თუ რომელიმე აკრძალულ პროდუქტზე ხელი წამიცდა, ამასაც აღვნუსხავ! სასწორზე ხელდადებული ვიფიცებ, რომ მონაცემები სწორი იქნება! 😉 რაც შეეხება წონას, აი, მაგის გამოქვეყნებას ნუ მომთხოვთ! პერიოდულად მხოლოდ დაკლებული კილოგრამების რაოდენობას მივუთითებ. ასევე დღის ბოლოს ჩამოვწერ მოკლე მონახაზს მეორე დღის გეგმებისთვის და სამსახურის შემდეგ ვიქოთქოთებ ხოლმე, თუ შესაბამისი განწყობა მექნება. ვეცდები, ეს ყველაფერი იმ ფორმით გავაკეთო, რომ არც თქვენთვის იყოს მოსაწყენი და ჩემს თავს დავეხმარო, პირველ რიგში!

მოკლედ დავიწყოთ: დღეს მიღებული კალორიები – სადღაც 1400-მდე (ბუუუუუ!), ვარჯიში – გავაცდინე, მაგრამ ობიექტური მიზეზის გამო (ჰმ), იდიოტური აზრები – იყო ერთი-ორი ცალი, მაგრამ არა აბეზარი და მალე გამოვიბერტყე თავიდან! (:yes:) აკრძალული საკვები –  შემწვარი კარტოფილი, ძალიან ცოტა! (ბუუუუ!)

გეგმები ხვალისათვის: ჩემი 1100-1300 კკალორიან კვების რეჟიმში ჩატევა! ვარჯიში, თუ იგივე მიზეზი ხვალაც არ მექნება! შრომითი დავების შესახებ ერთი ყოვლად მოსაწყენი სტატიის კითხვის დამთავრება (მჭირდება, რა ვქნა) და პლუს რამდენიმე პირადი პუნქტი, რომლებსაც აქ არ მოვიყვან.

სოკოს სუპს ვამზადებ ხვალისთვის ამ რეცეპტით, ოღონდ, ჩემი ინიციატივით, 1 სუფრის კოვზი ვაშლის ძმარი დავუმატე და წყლის რაოდენობა ცოტა შევამცირე, ძალიან ბევრი მეჩვენა. ვნახოთ, რა გამოვა!

საქოთქოთო დღეს არაფერი მაქვს, ასე რომ ხვალამდე! 😉

დატოვე კომენტარი »

აქა ამბავი, როგორ უნდა შევიცვალო და მოვიშალო მავნე ჩვევები!

დასაწყისისთვის: კარგად ვარ! მშვენიერ ხასიათზე ვარ და ყველაფერი კარგად მიდის! დიდ დროს ვხარჯავ სამსახურსა და სწავლაზე, როგორც პრე-დეპრესიულ პერიოდში, “თიდანში” სიარული განვაახლე  და სისულეებზე თითქმის არ ვფიქრობ!

მიუხედავად იმისა, რომ კარგად ვარ, როგორც ყველა ნორმალურ ადამიანს, ზოგჯერ ხასიათი მიფუჭდება! მაგალითად, დღეს საღამოს! წინა სამსახურის სურათებს ვათვალიერებდი და გავოგნდი! რეალურად სხვა ადამიანი ვიყავი! არა, მესმის, რომ 4 წელი ცოტა არაა და ყველა ვიცვლებით, მაგრამ ასეთი მეტამორფოზა მეტისმეტია! რა ვუქენი საკუთარ თავს?!

დეპრესიაში არა ვარ, უბრალოდ, ის გოგო მინდა დავაბრუნო! ღია ღია წაბლისფერი თმით, გამხდარი, ფართო, ნათელი თვალებით, მრგვალი ლოყების და ღაბაბის გარეშე! იდეალისტურ შეხედულებებსა და მთელი სამყაროს შეცვლის სურვილს, ალბათ, უკვე აღარაფერი ეშველება, მაგრამ “ფასადი” მაინც უნდა დავიბრუნო! 😉 ამისათვის კი, წინა და წინისწინისწინა პოსტში დასახული გეგმები აუცილებლად უნდა შევასრულო! გეგმები რომ შევასრულო, რაღაცეებს უნდა გადავჩვიო! ჰოდა, ვის მოვუყვე ამის შესახებ, თუ არა ჩემს საყვარელ ბლოგს?!

გადაუდებელი დახმარების სახით, აი, რაზე უნდა ვთქვა უარი:

კითხვის/ტელევიზორის ყურების/ინტერნეტში ძრომიალის დროს ჭამას. ჩვეულებრივ, ასე ხდება: “ახლა 1 ცალ ვაშლს ავიღებ, მწვანე ჩაის დავისხამ და რომელიმე სერიალს ვუყურებ!’ საბოლოოდ, 1 ვაშლი 5-ად იქცევა და ნახევარი მაცივარი საჭმელიც ემატება! იმ ზომამდე ვარ მისული, რომ საჭმელს გემოს ვერ ვატან, თუ რამეს არ ვკითხულობ ან ვუყურებ! ეს უნდა შეწყდეს!

აღარ ვჭამო ტკბილეული, როცა განერვიულებული ვიქნები. ბოლო ერთი თვე დღის წესრიგში არ დამდგარა, მაგრამ ესეც მნიშვნელოვანი პრობლემაა! გამომდინარე იქიდან, რომ რაღაც დროის მანძილზე სულ ცუდ ხასიათზე ვიყავი, ჩემს მიერ შთანთქმულმა ტკბილეულობამ სეეერიოზული დაღი დამატყო წელის მიდამოში! ეს ფაქტი ისე მაწუხებდა, ერთხელაც ავდექი და ვცადე, შოკოლადი დაბალკალორიული საშუალებით ჩამენაცვლებინა! უფრო კონკრეტულად -სიგარეტით! ერთ-ერთი ყველაზე დიდი იდიოტიზმია, რაც ამ ცხოვრებაში გამიკეთებია! კიდევ კარგი, ესეც ჩვევაში არ გადავიყვანე! არ გადავიყვანე რა, შოკოლადი უფრო მომწონს! 🙂 ჰოდა, მოკლედ, გამომდინარე იქიდან, რომ არც შოკოლადი, არც სიგარეტი და, თქვენ წარმოიდგინეთ, არც მწვადი არაფერს შველის ცხოვრებაში, ისევ ჯობია, პრობლემების გადასაჭრელად სხვა მეთოდები მოვძებნო!

თუ ამ ორ პუნქტს შევასრულებ, შევჭამ მხოლოდ მაშინ, როცა მშიერი ვიქნები და, სავარაუდოდ, იმდენს, რამდენიც შიმშილის დასაკმაყოფილებლად მეყოფა!

მესამე და არანაკლებ მნიშვნელოვანი პუნქტი: არასოდეს, არც ერთხელ არ გავაცდინო ვარჯიში! აქ სიტუაცია ამგვარადაა: თავად ვარჯიში არ მეზარება, მაგრამ ჭირივით მეზიზღება ფიტნეს ცენტრამდე მისვლის პროცესი! “თიდანი” ჩემს სამსახურთან არც ისე ახლოსაა და დაახლოებით 25-30 წუთის გატარება პიკის საათის დროს ავტობუსში მთლად საამო რომ ვერაა, თქვენც დამეთანხმებით, ხოდა, შედეგად, ყოველ საღამოს ჩნდება ცდუნება: ხომ არ წავიდე სახლში, რბილ დივანზე წამოვწვე და პირველი პუნქტში განხილული პროცედურის განხორციელბა დავიწყო?!  ჰოდა, არა! საკუთარი თავის ყურით წათრევა რომ დამჭირდეს, კვირაში 4-ჯერ  აუცილებლად ვივარჯიშებ! “თიდანის” პროგრამის შესაძლებლობები შემოდგომაზე რომ დავდიოდი, მაშინ გამოვცადე, ასე რომ, ამ მსხვერპლის გაღებად ნამდვილად მიღირს!

დასაწყისისთვის ეს იყოს! პრინციპში, სხვა მომაკვდინებელი ჩვევები არც მაქვს: არ ვარ ალკოჰოლიკი და ნარკომანი, არ ვეძალები აზარტულ თამაშებს, ფრჩხილებსაც კი არ ვიკვნეტ! არც მწეველი გავხდი, ჩემდა საბედნიეროდ!  რაც კარგია, იმიტომ, რომ ბევრად ნაკლები  პუნქტია ჩემს სიაში, ვიდრე შეიძლებოდა ყოფილიყო! პროკრუსტინაციის დამარცხებას შემდეგ ეტაპზე დავისახავ მიზნად, ჯერ ამათ მოვერიო!

3 კომენტარები »

To diet or … to diet!

ხვალიდან სრული სერიოზულობით ვიწყებ ექიმის დანიშნული დიეტის დაცვას! ეს იქნება პირველი, ასე ვთქვათ სატესტო ეტაპი. 1 თვის შემდეგ უნდა მივიდე, შედეგების შესამოწმებლად და ახალი ანალიზების ასაღებად. აუცილებელი პირობაა, რომ მთელი ამ დროის მანძილზე დიეტა არც ერთხელ არ უნდა დავარღვიო! თვითონ დიეტა იმაზეა დაფუძნებული, რომ აკრძალული მაქვს რამდენიმე სახის პროდუქტი. რაც შეეხება დანარჩენ საკვებ საშუალებებს, არჩევანში და მომზადების წესში თავისუფალი ვარ, უბრალოდ უნდა დავიცვა პროპორციები: 1/3 ცხოველური საკვები, 2/3 – მცენარეული. ასევე მინიმუმ 12 საათი დღე-ღამეში მშიერი უნდა ვიყო, ანუ, თუ 8 საათზე ვსაუზმობ, ვახშმობა მაქსიმუმ 8 საათზე შემიძლია! შედეგად, წესით, თვეში სადღაც 4-5 კილო უნდა დავიკლო ისე, რომ ორგანიზმი არ გამოიფიტოს და არც მე ვიყო ისტერიკაში, არიქა, ეს არ მეჭმევა, ის არ მეჭმება-თქო!  მოკლედ, 9 თებერვალს დავწერ, როგორ ვიყოჩაღე.

ისევ დიეტის თემაზე: ერთ-ერთ ჟურნალში წავიკითხე, თუ გახდომას გადაწვეტთ, უნდა ჩამოწეროთ ის მიზეზები, რის გამოც წონის დაგდება გინდათო. შემდგომში, როცა დიეტის დარღვევის ცდუნების წინაშე დადგებით, თქვენი ჩამონათვალი გაგახსენდებათ და მოტივაციას შეგმატებთო. ჰოდა, გადავწყვიტე, ეს მეთოდი დავტესტო და აქვე ჩამოვწერო ის მიზეზები, რის გამოც ფორმაში ჩადგომა მინდა.

მაშ ასე, უნდა გავხდე იმიტომ, რომ:

  1. კარგად გამოვიყურებოდე;
  2. არ შემექმნას ჯანმრთელობის პრობლემები (ამით უნდა დამეწყო);
  3. ტრანსპორტში პატარა ადგილი დავიკავო :);
  4. პატარა ზომის ტანსაცმელი ვიყიდო, რაც არჩევანსაც გამიფართოვებს და უფრო ეკონომიურიცაა. ქსოვილის ეკონომიაზე არ მაქვს საუბარი, უბრალოდ, საქართველოში სულ თითებზე ჩამოსათვლელი მაღაზიებია, სადაც დიდი ზომის ტანსაცმელი იყიდება, ამ მაღაზიებშიც ფასები ასტრონომიულია, ხარისხი – ფასის მეათედი, არჩევანიც საკმაოდ მწირი! ტანსაცმლის დიდი ნაწილი ბებიაჩემის ასაკის ქალებისთვისაა გათვლილი! რაც შეეხება ონლაინ შოპინგს, შემჩნეული გექნებათ, ერთი და იგივე ტანსაცმლის ფასი ზომის და, ზოგჯერ, ფერის მიხედვით როგორ იცვლება. ჰოდა, პატარა ზომა = უფრო იაფს;
  5. ახლობელ-ნათესავებმა ტვინის ჭამას თავი დაანებონ (ტყუილია, სხვა საბაბს იპოვნიან);
  6. უფრო ენერგიულად ვიყო და ზაფხულის სიცხეც უკეთესად გადავიტანო;
  7. ცეკვის დროს მოხტუნავე ვინი-პუჰს არ ვგავდე.

სულ ეს 7 პუნქტია! ამჯერად სერიოზულად ვიწყებ ჭარბ წონასთან ბრძოლას! საკუთარი პროგრესის შესახებ აქ დავწერ, პერიოდულად!  2012 წლის ბოლო პოსტს რომ დავწერ, აუცილებლად უნდა აღვნიშნო, როგორ გავხდი და სნოგშიბაწელნა გამოვიყურები!

7 კომენტარები »

პრაგრეს!

მწარე ცუდი გოგოა!–ლამაზი კალიგრაფიით 20–ჯერ უნდა დავწერო ეს ფრაზა! მოსწავლეებს სჯიდნენ ასე ოდესღაც, გამიგია. მე მოსწავლე არ ვარ, მაგრამ ის, რომ ცუდად ვიქცევი, ცხადია! ამაყად დავდე პირობა, ხშირად დავპოსტავ–მეთქი და ამის შემდეგ სულ დავიკარგე! საერთოდაც, ტრადიციულ შესავლად მექცა ბოდიშის მოხდა იმის გამო, რომ ბლოგს დიდი ხნით ვტოვებ. მომაბეზრებელია, ალბათ, არა?

არა, არც ისე ცუდი გოგო ვარ, კაცმა რომ თქვას! წინა პოსტში ჩამოწერილი პუნქტების სისრულეში მოყვანას ვიწყებ. სიტუაცია არის შემდეგი: ერთი ექიმი კატეგორიულად მაფრთხილებს, რომ ამ ეტაპზე ჩემთვის ვარჯიში არ შეიძლება, მეორე მეუბნება, რომ შეიძლება. მეც ავდექი და “ოქროს შუალედის” მოძებნა ვცადე – დავიწყებ ვარჯიშს, ოღონდ არასრული დატვირთვით! ანუ, რას ვგულისხმობ, ადრე აერობიკაზე რომ დავდიოდი, 1–საათიანი პროგრამა გვქონდა, კვირაში სამი დღე, ანუ კვირაში 180 წუთი.  თუ ყოველდღე 25 წუთს ვივარჯიშებ , ჯამში თითქმის იგივე დრო გამოდის და თან ისე ძაან არც დავიღლები. ლოგიკა აბსოლუტურად ჩემია და არ მაინტერესებს სწორია თუ არა! 🙂

გუშინ დიეტოლოგთანაც ვიყავი. კარგად შემახურა ახალ წლებზე არეული რეჟიმის გამო. დავიმსახურე, ვერაფერს იტყვი! ვიბრომასაჟორების გამოყენება მირჩია, დაგეხმარებაო! ხო, ვარჯიშის თემაზე, ახლო წარსულში, რომელიღაც რეკლამით “დაბოლებულმა” დედაჩემმა ეს მაჩუქა:

მაშინ ვარჯიში აკრძალული მქონდა და ვერ გავსინჯე, მაგრამ ახლა მივმართე. ჰმ, დიდად კმაყოფილი არ ვარ. ტრენაჟორის მთელი იდეაა ისაა, რომ საზურგეს როცა გადაწევ, გვერდებში დამაგრებულმა ზამბარებმა (აკა პრუჟინებმა), იგი თავისით საწყის მდგომარეობაში უნდა მოიყვანოს, რითაც ვარჯიში გაადვილდება, მაგრამ იმდენად სუსტი ზამბარები აქვს, რომ თავისით ვერაფერს შვება, თან ხერხემალი გტკივა. მუცლის კუნთებსაც ჩვეულებრივი პრესის ვარჯიშები უკეთესად ამუშავებს. მოკლედ, ნი რეკომენდუიუ!

გეგმის დანარჩენ ნაწილებში სიახლე არ არის, მაგრამ ეგეც დროის საკითხია! მე ხომ გარიგება დავდე საკუთარ თავთან, რომ თუ ახალ ლეპ–ტოპს ვიყიდდი, საკუთარ ცხოვრებას შევცვლიდი, როგორც იურისტი კი (თუმცა ეგ რა შუაშია), ყოველთვის ვასრულებ ნაკისრ ვალდებულებას, თუნდაც საკუთარი თავი წინაშე! პერიოდულად დავპოსტავ პროგრესის შესახებ!

5 კომენტარები »

Ugly Betty, სელებრითები და მაიკლ სკოფილდი

ugly-betty1

მოკლედ ასე, მაიკლ სკოფილდი ცხარე ცრემლებით დავიტირე, ჰაუსი ფსიქიატრიულში გავგზავნე, ჯეკსა და სოიერს მხურვალე ჰაეროვანი კოცნა გავუგზავნე დამშვიდობების ნიშნად, თვითონ კი Ugly Betty-ს ჩავუჯექი.

მდა, სამყაროსავით ძველი ამბავია, უშნო გოგოზე, რომელიც ლამაზების სამყაროში ხვდება და თავის ადგილს იმკვიდრებს. გლამურის სამყაროში, სადაც ლამაზი და გაჩხინკული მოდელები მეფობენ, ბრეკეტებიან, სათვალიან და ჭკვიან ქალს თითქოს რა უნდა ესაქმებოდეს, მაგრამ, ნურას უკაცრავად, ბეთი იშიო ტა!

ამ სერიალმა სელებრითების ცხოვრებაზე ჩამაფიქრა. აი, ეს მოდის სამყაროს ქალები, ყველა უკლებლივ ძალიან ლამაზი და ძალიან უბედურია. თითოეული მათგანი ადგენს კლიშეს, სტანდარტს, რომლის მსხვერპლიც ბოლოს თავად ხდება. ყველას უნდა მათ დაემსგავსოს, თითოეულ მათ ნაბიჯზე მთელი ვქვეყანა ლაპარაკობს, ისინი კი ამ დროს არინ მშივრები, გაქუცულები და სასოწარკვეთილები! არც ერთი ცხოვრობს რეალური ცხოვრებით, ხლართავენ ინტრიგებს, ადგენენ სილამაზსი და სწორი ქცევის კრიტერიუმებს, მერე კი თავს იკლავენ, თავინთ მოჭერილ ქამარში რომ ჩაეტიონ. შეგიძლიათ გასიებულ ბოღმად ჩამთვალოთ, მაგრამ არასოდეს მესმოდა ხალხის, რომლებიც ორი კილოგრამის გამო სასოწარკვეთილებაში ვარდება, წონის თითეულ გრამ საკვებს და ითვლის ყველა კალორიას, ან სულაც საკვების ყოველი მიღების შემდეგ უნიტაზში ეყუდება! ხოდა, მოკლედ, ეს მისაბაძი სელებრითები ნერვებს იწყვეტენ, ამ დროს კი ჩვეულებრივი, სქელტრაკა მექსიკელი გოგო ბედნიერების მასტერკლასებს ატარებს! გული მიგრძნობს, ბეთი ბოლოს თავის შეფსაც, ლაკომი დენიელსაც (თუ რაც ჰქვია) ჩაიგდებს ხელში! რაც შეეხება კაცებს ამ სამყაროში, ჰეჰე, ისინი ყველგან კაცები არიან, მოკლე ჭკუით და დიდი ეგოთი! ჰგონიათ, დედამიწა მათ გარშემო ტრიალებს და თუ გოგო სიტყვა სექსს ახსენებს, თვლიან, რომ მათ საწოლში ჩახტომაზე ოცნებობს! არა, რა კაცი ყოველთვის ადვილი სამართავია! :ამაყიფემინისტურისმაილი:

მოკლედ, ვიცი, რომ ახალი და ორგინალური არაფერი დამიწერია, მაგრამ იმის თქმა მინდოდა, რომ ბედნიერება მოდელურ პარამეტრებს არ მოაქვს! იდეალურად მკვრივი საჯდომი და მკერდი საბოლოო ჯამში მარტოობისაგან ვერ გვიხსნის! ამიტომაც თავს ნუ მოიკლავთ ამ სისულელეებზე. მოიხმარეთ ის, რაც გიწყალობათ ბუნებამ! მე არც ანტიდიეტისტკა ვარ და არც იმისკენ მოგიწოდებთ, რომ გასივდეთ, ფეხი ფეხზე გადაიდოთ და ბედნიერი ვარო, იძახოთ! Just რეალობის გრძნობას ნუ დაკარგავთ, მილიე დამი! That’s all!

10 კომენტარები »